Avant (yé) découver pays là, Compair Bouki et Compair Lapin tapé crévé faim et yé familles té pas gagnin arien pou mangé. In jou, Compair Bouki couri trouvé so zami Compair Lapin et di li :
- Nous autes femmes et pitits apé crévé faim et mo vini (oua) vous pou no tiré in plan pou sauvé yé, sipposé no té vende no momans! (Bouki) consent (et) lennemin matin yé té gagnin pou parti pou la ville. Lapin zonglé et li couri dit so moman qué li té gagnin pou méné li au marché, mais qué li va maré li avec in la ficelle pou donné li la chanche chapé quand li té vende li. Bouki, li, prane in gros la corde et li maré so moman bin, pou li té pas capabe chapé, et yé parti pou la ville.
Bouki, quand yé rivé, vende so moman pou cinquante-onze piasses, et avé l'argent là li acheté in charrette et pis trois milets et in gros tas provisions. Lapin offert so tchène moman on marché, mais avant personne achté li, Man Lapin cassé so la ficelle et chapé.
Bouki dit:
- To oua ça? To si bête qué to va crévé faim toujou!
Lapin parti et couri caché au bord (chimin) ousqué Bouki té gain pou
passé. Quand Bouki rivé là et oua Lapin qui té semblé crévé, li di:
- Ga, si c'est pas honté ça, ya pé mouri com des mouches!
Bouki tayé so milés yé et Lapin lévé et galopé dans zerbes, jikà li rendi loin divant Bouki. Là, li couché au bord chimin et fait	 com si
li té mouri. Quand Bouki rivé là 	et li ouar Lapin, li di:
-	Ga! in note encor, yé tous fouti! Mais si mo té pranne premié-là, mo té gain dé lapins pou mo dîné. Ma couri cherché l'oté-là!
Bouki quitté so charrette là, et parti cherché premié lapin qué li té oua.
Compair Lapin, qui té couché là ora charrette Bouki, lévé et di:
-	Mo cré qué mo va prane tout ça 	Bouki gain icite, et ma coupé la tcheu mi lé yé et yé zoreils et mo va 	planté yé dans la ter pou fait Bouki acroi qué zanimaux-yé et charrette-là calé en place et qué tous so zeffets-yé en bas la ter.
Lapin fait com li té di, et après li té fini li monté dans charrette-là et hélé on milé-yé:
-	Com mape ya!
Quand Bouki rendi ousqué li té oua premié lapin-là, li gardé et li cherché partout, mais li pas trouvé li, alor li tourné côté-là ousqué li té laissé so charrette. Quand li rivé là, li té tonné pou pas oua so charrette, mais quand li gardé bin, li oua la tché so trois milés-yé apé sorti dans la ter, et yé zoreils oussite, et Bouki hélé:
-	Vous otes olé di moin si c'est pas terribe ça! Mo milés et mo charrette provisions qui déjà calé drette là. Mais laissé-mo halé on yé la tché, pétette ma sorti yé.
Alor Bouki trapé eine dans la tchés-yé et li halé, mais la tché-là vini tout selle, alor Bouki di:
-	Ga! mo déjà raché la (tché) eine dans milés-yé!
Li halé (on) dé (lotes) la tchés-yé et li raché yé oussite. Alor li di:
-	Ma seyé so zoreils.
Mais quand li halé eine dans zoreils-yé li vini sans forcé; alor Bouqui di:
-	Mo crois ma gain pou GO DOWN et fouyé pou mo zeffets-yé. Yé doit calé fond même!
Et quand li tapé fait un pu pou cherché apré so bitin, Lapin tapé rivé côté li com in gros riche, avé charrette, milés et tout zespèces provisions. Et prémié qui chose li oua en arrivant, c'était so moman qui té rendi avant li.