Conte Nègre VII (8 juin 1878)
Compair Cabri et Compair Tigue
Kan Compair Cabri prémié rivé dan péhi cilà, tou moune té pair li. Mo zamis, kapé couté conte cilà si ouzote mem té ouâ so cornes avé so la barbe, ouzote té galopé. Jikà Compair Tigue ki tramblé kan li contré avé li. Compair Cabri vini vantor, marcé la tête en l'air et croâ li mem cé liron dan savanne et dan diboi. Kan Compair Tigue couri la chache, li souvan ouâ Compair Cabri et li zonglé:
- Gayare cilà té fé bon la vianne fraîche; mé corne là yé cé pa batême katin; si mo také li, sire la vantré mouen!
Tan pacé et moune pa tendé di Compair Cabri tchoué kékenne. Ein zou Compair Tigue, ki pli brave, pran couraze et parti avé so ti gasson pou couri fé visite à Compair Cabri. Compair Cabri ouâ Compair Tigue apé vini dan chimin.
-	Hanhan! to dijà pair mouen, mé ma fé toâ pli pair ancô.
Li parti galopé: pracatap! pracatap! pracatap! et li cogné so la tête apé ein diboi: bip! Diboi la boudoume: kraaou! Compair Tigue apé tramblé on so jigues et pa konné parlé.
-	Pa gagné pair, mo gasson; navé ein dipice on mo la tête, et mo cogné li apé diboi pou tchoué li.
Compair Tigue été so sapo et di:
-	Michié Cabri, mo vini présanté vou mo respé avé mo gasson, et mandé nouvel vou famie.
-	Yé tou va ben. Vini assite on mo la garli.
Tan yé té apé charé, ti gasson Compair Cabri couri zoué dan zardin avé ti gasson Compair Tigue. Ti Tigue mandé ti Cabri:
-	To konné voyé cou tête com to popa?
-	Oh oui, ma fé to ouâ.
Li kilé ein ti brin, et pi galopé et cogné ti Tigue dan so côté: bip! Ti Tigue roulé on so do; ti Cabri ri: kiack! kiack! kiack! Ti Tigue di li:
- To gagné tou piti dan.
-	Oui, mo popa so dan tou piti oussi.
Compair Tigue pélé so ti gasson et parti couri. Ti Tigue di li:
-	Popa, ti Cabri gagné tou piti, piti dan, et li di mouen dan so popa piti com so kenne.
- Pé to la djole! Si Michié Cabri tendé toi, la manzé nouzote.
Compair Cabri té promi ranne so visite à Compair Tigue dan kèke zou. Compair Tigue zonglé ça so ti gasson di li.
-	Mo té ben olé ouâ dan Compair Cabri; mé so gran la barbe cacé so la bouce; kan la vini, fô mo seyé fé li ri.
Ein zou Compair Cabri vini avé so ti gasson. Compair Tigue couri charché ein bouteil bon tafia, et yé boâ yé santé. Li couri charché ein lot, et yé boâ la santé yé zanfans. Compair Cabri comancé vini tchack, et olé parti. Compair Tigue di li:
-	Fô no boâ ein lote topète à la santé Madamme Cabri.
Et li couri charché li. Tan yé fini boâ, Compair Cabri té gagné ein famé ganarre et ri so la bouce gran ouvert. Compair Tigue, ki té apé guêté, ouâ so ti dan, et sotté on li drette et percé so cou avé so kro. Compair Cabri crié:
-	Zassassin! zassassin!
So ti gasson, ki té apé zoué diyor, tendé li et parti galopé. Couri di so maman Compair Tigue tchoué so popa. Compair Cabri si tan sagrin li krié jikà krié pa olé ancô.
La Renne zozos, ki té apé passé, tendé li et posé on chimné so cabanne.
-	Ki ça ké vou gagné pou dézolé com ça, Compair Cabri?
-	Malor! malor! bon la Renne; Compair Tigue manzé mo pove mari, et astère mo ben croâ la vini manzé mouen avé mo piti.
-	Couraze! pa krié! Ma sové vou, ou ben mo nom cé pa la Renne.
Li pran so vol et couri jouké on pli gran cype dan diboi. Là li chanté:
Tig, tig, malinboin,
La chelema che tango Redjoum.
La chemela che tango!
Kan zozos yé tendé gran sanson la Renne, yé tou rassamblé aurà li.
La Renne di yé:
- Mo zanfans, Compair Tigue sassiné Compair Cabri, et mo promi so vêve pou vangé li. Dimin, cé dimance; apé la messe, mo va donne ein gran bamboula, et mo olé tou ouzote vini. Couri paré tou kichoge: mouen, pé allé invité Compair Tigue.
Landimin, apé la messe, tou moune ki gagné la plime rassamblé dan gran diboi. Kan la Renne ouâ Compair Tigue apé vini, li di zozos yé:
- Kan bamboula comancé, ouzote a tou mété la tête 	en ba	 zélé.
Compair Tigue té farô com ein pan et té apé frizé 	so moustace. Tousouite li rivé, ein bande pérokés passé pain béni et chakenne pran ein moceau. Tan yé fini manzé, tou cavalié pran yé dammes et mêté en place pou dancé. Compair Tigue mandé la Renne pou	 so padna.
-	Mo ben olé, mé fé vou dancé com mo	kenne moune.
Mizichiens comancé joué:
Tig, tig, malinboin!
et tou la tête zozos fouré en ba zèle.
-	Vou ouâ, Compair Tigue, tou mo zinvités pa gagné la tête, fé vou ôté vou kenne pou konné dancé dan kadril la Renne.
-	Mo té pa konné zesse gran moune. Mé coman fé pou ôté mo la tête?
La Renne donne li ein ti boëte:
- Çà, cé la gresse zozo paradis; couri gressé vou la hace avé li et di vou famme coupé vou cou; ça pa pé fé vou mal. Apé ça, vou va dancé avé mouen.
Compair Tigue galopé côté so cabanne, gressé so la hace, et di so famme fé li coupé so cou.
-	La Renne zozos mêté wanga on toi, mo vié; to fé mié rêté dan cabanne.
-	Si to pa fé ça, mo di toi, mo tranglé toi com titice.
Compair Tigue gagné pair mouri, li pran la hace et coupé cou so mari. La Renne zozos té voyé so colibri pou porté nouvel. Kan li tourné vini, yé tou chanté:
Tig, tig, malinboin!
Compair Cabri vanzé, mé li ben mouri. Ma di ouzote: Zamé boâ tafia dan cabanne ouazin jikà vou vini tchak!