Conte Nègre IV  (15 juillet 1876)
Dan tan lé zot foi, Compair Chivreil avé Compair Torti té tou lé dé apé fé la mou à Mamzel Calinda. Mamzel Calinda té lémé mié Compair Chivreil, cofair li pli vayant, mé li té lémé Compair Torti oussite, li si tan gagné bon tchor. Popa Mamzel Calinda di li:
-	Mo fie, li tan to mayé; fô to soizi cilà to oulé.
Landimin, Compair Chivreil avé Compair Torti rivé tou yé dé côté Mamzel Calinda. Mamzel Calinda ki té zonglé tou la nouite di yé:
-	Michié Chivreil avé Michié Torti, mo popa olé mo mayé. Mo pa olé di ein dan ouzote non. Ouzote a galopé ein la course dice foi quate narpan; cilà ki sorti divan, ma marié avé li. Apé dimin dimance, ouzote a galopé.
Yé parti couri, Compair Chivreil so tchor contan; Compair Torti apé zonglé li mem:
-	Dan tan pacé, mo gran popa bate Compair Lapin pou galopé. Pa koné coman ma fé pou bate Compair Chivreil.
Dan tan cilà, navé ein vié, vié cocodri ki té gagné plice pacé cinkant di zan. Li té si malin, yé té pélé li Compair Zavoka.
La nouite vini, Compair Torti couri trivé Compair Zavoka et conté li coman li baracé pou so la course. Compair Zavoka di Compair Torti:
-	Mo ben olé idé toi, mo gaçon; no proce mem famie: la tair avé do lo mem kichoge pou nizot. Ma zonglé zafair cilà. To vini dimin bon matin, ma di toi ki pou fé.
Compair Torti couri coucé, mé li pas dromi boucou, li si tan tracacé. Bon matin, li parti couri côté Compair Zavoka. Compair Zavoka dijà diboute apé boi so kafé.
-	Bonzou, Michié Zavoka
-	Bonzou, mo gaçon. Zafair cilà don mouen boucou traka, mé mo cré ta bate Compair Chivreil, si to fé mékié ma di toi. Vouzote a pran jige jordi pou misiré chimin au ra bayou; chac quate narpan mété zalon.
Compair Chivreil a galopé on la té; toi, ta galopé dan dolo. To ben compran ça mo di toi?
-	Oh oui, Compair Zavoka, mo ben couté tou ça va pé di.
- A soua, kan la nouite vini, ta couri pranne nef dan to zami,et ta caché eine dan zerbe au ra chakène zalon yé. Toi ta couri caché au ra la mison Mamzel Calinda. To ben compran ça mo di toi?
-	Oh oui, Compair Zavoka, mo tou compran mékié ça vou di.
-	Eh ben! couri paré pou sové l'onair nou nachion.
Compair Torti couri côté Compair Chivreil, et ranzé tou kichoge Compair Zavoka di li. Compair Chivreil si tan sir gagné la course, li di oui tou ça Compair Torti oulé.
Landimin bon matin, tou zabitan samblé pou ouâ gran la course. Kan l'hère rivé, Compair Chivreil avé Compair Torti tou lé dé paré. Jige là crié; Go! et yé parti galopé. Tan Compair Chivreil rivé côté primié zalon, li hélé:
-	Halo! Compair Torti!
-	No là, Compair Chivreil.
Tan yé rivé dézième zalon, Compair Chivreil siflé: fioute! Compair Torti réponne: croak! Trozième zalon bouté, Compair Torti touzou tink à tink avé Compair Chivreil.
- Diable! Torti là galopé pli vite pacé sinbotte; fo mo grouyé mo
cor.
Tan Compair Chivreil rivé côté névième zalon, li ouâ Compair Torti apé patchiou dan dolo. Li mété tou so la foce diyor. Pou arien; avan li rivé côté bite, li tendé tou moune apé hélé:
- Houra! houra! pou Compair Torti!
Tan li rivé, li ouâ Compair Torti on la garlie, apé brassé Mamzel Calinda. Ça fé li si tan mal, li sapé dans di boi.
Compair Torti mayé avé Mamzel Calinda samdi ka pé vini, et tou moune manzé, boi, jika yé tchiak!